jab se hai vo raunaq-e-mahfil ankhon men
jaan labon par rahti hai dil ankhon men
suukh rahi hai ju-e-girya-e-gard-nishan
chubhne lagi hai ab ḳhak-e-dil ankhon men
hijr ki raten arsa-e-be-ḳhvabi ka safar
kaaT raha huun manzil manzil ankhon men
ḳhuun ki lahren moti moti palkon par
nikla dil-dariya ka sahil ankhon men
dekh raha huun guzre vaqt ki tasviren
utre hain yadon ke mahmil ankhon men
Leave a Reply