ham doston ke lutf-o-karam dekhte rahe
hote rahe jo dil pe sitam dekhte rahe
ḳhamosh qahqahon men bhi gham dekhte rahe
duniya na dekh paa.i jo ham dekhte rahe
allah-re josh-e-ishq ki uThti jidhar nazar
tum ko hi bas ḳhuda ki qasam dekhte rahe
nagah paḌ ga.i jo kahin un pe ik nazar
ta-der apne aap ko ham dekhte rahe
ham ne to baḌh ke chuum liya astan-e-yar
hasrat se ham ko dair o haram dekhte rahe
jo saath mere chal na sake rah-e-shauq men
vo sirf mere naqsh-e-qadam dekhte rahe
barson ke ba.ad un se mile bhi to is tarah
pahron vo ham ko aur unhen ham dekhte rahe
har shaam ek ḳhvab-e-sahar men guzar di
har sub.h ek sham-e-alam dekhte rahe
chalte hi daur-e-jam jo ahl-e-nigah the
kis kis ki astin thi nam dekhte rahe
sab kuchh vahi tha phir bhi gulistan men aaj ham
kya shai thi ho ga.i hai jo kam dekhte rahe
basti men log aise bhi hain kuchh base hue
aaya jidhar se tir-e-sitam dekhte rahe
aa.e the apne chahne valon ko dekhne
kitna hai kis mariz men dam dekhte rahe
Leave a Reply