Suleman Khumar
haya bhi aankh men varaftagi bhi
badan men pyaas lab par ḳhamushi bhi
dariche band hon achchha hai lekin
zaruri hai hava bhi raushni bhi
main vaqif huun tiri chup-goiyon se
samajh leta huun teri an-kahi bhi
pahan len lams ki anchen kisi din
pighal jaa.e ye hadd-e-aḳhiri bhi
kiya karti hai sajde mujh ko Thokar
muqaddas hai miri avargi bhi
tumhen kho kar bhi tum ko pa chuka huun
mira hasil miri la-hasili bhi
yahi ik moḌ tak aana bichhaḌna
yahi qismat tumhari bhi miri bhi
Leave a Reply