Zameer Kazmi
majnun bhi ḳhairiyat se hai laila maze men hai
ik tum mire na ho sake duniya maze men hai
titli udaas ho ke chhupi dekhti rahi
phulon se khelta hua bhanvra maze men hai
duniya ke saare rang vahi hain tumhare ba.ad
mujh ko akela karke zamana maze men hai
mausam tumhare husn ke masti shabab ki
rahte ho jis men tum vo ilaqa maze men hai
ai ḳhush-nasib chand ki matvali chandni
us se ye kahna dard ka maara maze men hai
be-rahbar hai ab bhi mira qafila ‘zamir’
lekin vo ḳhush hai us ka qabila maze men hai
Leave a Reply