Sardar Panchhi
de ke dastak shabab aata hai
bin-bula.e hijab aata hai
pahle ankhon men ḳhvab aata hai
tab kahin inqalab aata hai
phir to rahti nahin nadi beva
jab pahaḌon se aab aata hai
saqiya tere bada-ḳhane men
sirf izzat-ma.ab aata hai
kaise mil pa.egi hamen jannat
va.izon ko hisab aata hai
aise aate hain vo miri janib
jaise jam-e-sharab aata hai
vo bhi aate hain baam par aise
jis tarah mahtab aata hai
un ke hisse men aa.iin ta.abiren
mere hisse men ḳhvab aata hai
din men kar lo sabhi diye raushan
un ke ruḳh par naqab aata hai
tohfa denge tumhen jo phulon ka
ham ko bhi intiḳhab aata hai
tum chaloge jo simt-e-mai-ḳhana
pichhe ‘panchhi’-janab aata hai
Leave a Reply