angan angan ḳhana-ḳharabi hansti hai me.amaron par
patthar ki chhat Dhaal rahe hain shishe ki divaron par
zaḳhm lage to bas ye jaano choT paḌi naqqaron par
aaj laga do jaan ki baazi TuuT paḌo talvaron par
ahl-e-junun ki lala-kari mausam ki paband nahin
fasl-e-ḳhizan men phuul khule hain zindan ki divaron par
dil ke ufuq se TuuT ga.e hain kitne suraj kitne chand
Tapke hain do-char sitare jab tere ruḳhsaron par
kahte hain ḳhush-qamat kis ko dekh nikal kar gulshan se
kaise kaise sarv-e-ra.ana chalte hain angaron par
is sahil par naav paḌi hai us sahil par manjhi hai
beach nadi men tairti lasho pul ban jaao dharon par
Leave a Reply