Anjum Fauqi Badayuni
baat ki baat se Dar lagta hai
is musavat se Dar lagta hai
tum koi baat samajhte hi nahin
bas isi baat se Dar lagta hai
jis men koi na mile apne siva
us mulaqat se Dar lagta hai
dil ba-zid hai ki vahi baat kaho
sab ko jis baat se Dar lagta hai
raaz ki baat to koi bhi nahin
arz-e-halat se Dar lagta hai
jin men garmi na ujale na mahak
aise din-rat se Dar lagta hai
ḳhud ko parkha to ye samjhe ‘anjum’
kyuun kisi zaat se Dar lagta hai
Leave a Reply