mere badan men thi tiri ḳhushbu-e-pairahan
shab bhar mire vajud men mahka tira badan
huun apne hi hujum-e-tamanna men ajnabi
main apne hi dayar-e-nafas men jila-vatan
sab pattharon pe naam likhe the rafiqon ke
har zaḳhm-e-sar hai sang-e-malamat pe ḳhanda-zan
ab dasht-e-be-aman hi men shayad mile panah
ghar ki khuli faza men to baḌhne lagi ghuTan
har aadmi hai paikar-e-fariyad in dinon
har shaḳhs ke badan pe hai kaghaz ka pairahan
ḳhush-fahm hain ki sirf rivayat parast hain
ḳhush-fikr the ki le uḌe tariḳh ka kafan
is daur men yahan bhi filistin ki tarah
kuchh log be-zamin hue kuchh log be-vatan
misl-e-saba koi idhar aaya udhar gaya
ghar men basi hui hai magar bu-e-pairahan
‘sarshar’ main ne ishq ke ma.ani badal diye
is ashiqi men pahle na tha vasl ka chalan
Leave a Reply