Najeeb Ahmad
pairahan uḌ ja.ega rang-e-qaba rah ja.ega
phuul ke tan par faqat aks-e-hava rah ja.ega
ham to samjhe the ki charon dar muqaffal ho chuke
kya ḳhabar thi ek darvaza khula rah ja.ega
kirchiyan ho ja.engi ankhen bhi ḳhvabon ki tarah
a.inon men naqsh sa tasvir ka rah ja.ega
baat lab par aa ga.i to kaun rokega use
aur tera haath honTon se laga rah ja.ega
soch lena an-suni baten sunenge ek din
dekh lena har fasana an-kaha rah ja.ega
ai gunahgaron ke dushman ai niko-karon ke yaar
kaun jaane kya miTega aur kya rah ja.ega
ham bichhaḌ ja.enge shaḳh-e-umr se gir kar ‘najib’
ik tane par naam donon ka likha rah ja.ega
Leave a Reply