ba-juz saaya tan-e-laghar ko mere koi kya samjhe
miri surat ko mahfil men vo naqsh-e-boriya samjhe
ham us ko apne haq men afat-e-jan aur bala samjhe
butan-e-be-vafa hain jin ko ik apni ada samjhe
koi kya khaak raz-e-mushkil-e-zat-e-khuda samjhe
agar nur-e-khuda ko zat-e-insan se juda samjhe
vahan ja kar kare gar qatl tu bimar-e-hijran ko
tire kuche ko apne haq men vo darushshifa samjhe
siyah-bakhti pe saaya gar ho teri zulf-e-shab-gun ka
use vo apne sar pe saya-e-bal-e-huma samjhe
vahi karta hai insan kaam jo qismat karati hai
koi chahe use samjhe rava ya narava samjhe
latakte dekha siine par jo tere tar-e-gesu ko
use divane vahshat men tira band-e-qaba samjhe
na hargiz khuun rulae bulbulon ko baagh men ai gul
jo apne husn ko tu tair-e-rang-e-hina samjhe
tire aina-e-rukh ko sikandar dekhne aaya
tiri mahfil men ham us ko gada-e-be-nava samjhe
koi kya janta hai kis qadar bose liye ham ne
samajhte hain ham us ko ya hamara dil-ruba samjhe
buton se ham ne joda rishta-e-dil ko vo kafir hai
agar is rishta ko koi hamare narava samjhe
tu ja kar chhed gul ko ya kisi ki zulf-e-pechan ko
chal ai bad-e-saba tu kya miri naz-o-ada samjhe
kabhi baitha bhi gar dekha unhon ne apne kuche men
tan-e-laghar ko mere vo kisi ka naqsh-e-pa samjhe
bayaban men jo aaya koi jhonka bad-e-sar-sar ka
tiri ham sard-mehri se nasim-e-jan-faza samjhe
vahi hain ham banaya jo hamen haq ne nahin parva
koi ham ko bura samjhe koi ham ko bhala samjhe
bhale ko gar bura samjhe na hargiz vo bura hoga
bhala is men bura kya hai bure ko gar bura samjhe
hai insan ke liye lazim jahan men dekh kar chalna
vo hai haivan na dil men jo zamane ki hava samjhe
agar us ne kabhi toda hamare gauhar-e-dil ko
ham us ke haq men us ke tutne ko momiya samjhe
pighal kar shama khud parvana ko pahle jalati hai
kisi ke mom hone ko na koi momiya samjhe
gareban ham ne dikhlaya unhon ne zulf dikhlai
hamara samjhe vo matlab ham un ka muddaa samjhe
khuda ko samjhe tum patthar jo patthar ko khuda samjhe
agar samjhe use patthar to phir tum us ko kya samjhe
tariq-e-khaksari sullam-e-bam-e-buzurgi hai
usi ko ‘mashriqi’ insan jahan men kimiya samjhe
Leave a Reply