laga di kaghzi malbus par mohr-e-sabat apni
bashar ke naam kar di hai ḳhuda ne ka.enat apni
ḳhala ke aar bhi main huun ḳhala ke paar bhi main huun
ubuur ik pal men karta huun hudud-e-mumkinat apni
jiyunga apni marzi se marunga apni marzi se
mire zer-e-tasallut hai fana apni hayat apni
likhi hai main ne apne haath par tahrir-e-a.inda
miri apni virasat hai qalam apna davat apni
main ḳhud par azma.unga ḳhud apna aḳhiri daav
ḳhabar hai mujh ko ‘sajid’ jiit ban ja.egi maat apni
Leave a Reply