zehn par jab dard ḳhamoshi ki chadar tanta hai
qatra qatra aankh se lafz-o-ma.ani chhanta hai
har kas-o-na-kas ko raas aati nahin avaragardi
raste us par hi khulte hain jo chalna janta hai
naqsh-e-parina haTa kar main nae paikar tarashun
kuza-gar kankar haTa kar jaise miTTi santa hai
vo hai divana use gumnami o tash.hir se kya
ḳhamushi se kar guzarta hai jo dil men Thanta hai
kor-chashmi ne bikhera husn ka shiraza varna
ishtihari jism bhi poshidgi ko manta hai
ye sila bhi kam nahin ‘azim’ tiri mashq-e-suḳhan ka
koi ghazlon ke havale se tujhe pahchanta hai
Leave a Reply