Bataen Kya Ki Aae Hain Kahan Se Hum Kahan Ho Kar

Pandit Jagmohan Nath Raina Shauq

bata.en kya ki aa.e hain kahan se ham kahan ho kar

nishan ab DhunDte-phirte hain ghar ka be-nishan ho kar

lubhane ko dil-e-shaida ke saari parda-dari thi

ayaan ho tum nihan ho kar nihan ho tum ayaan ho kar

hamari ḳhaak ke zarre fana ho kar bhi chamkenge

uruuj apna dikha.en ge ye najm-e-asman ho kar

dil-e-avara kyuun tujh ko ḳhayal ku-e-janan hai

are nadan kahan ja kar rahega be-nishan ho kar

ye daur-e-mai-kashi har-vaqt mahv-e-did rakhta hai

kahan ankhon men ye ghaflat rahe ḳhvab-e-giran ho kar

musalman ho ke tark-e-but-parasti ai ma.az-allah

ḳhuda ko ham ne pahchana hai shaida-e-butan ho kar

ye bar-e-ma.asiyat manzil kaḌi aur sham-e-tanha.i

chale hain kya samajh kar ham bhi rusva-e-jahan ho kar

abhi kya jaane kya kya rang vo ai ‘shauq’ badlega

zamin par ik karega hashr barpa asman ho kar