Abdurrahman Wasif
ye kaun mere alava mire vajud men hai
ki ek shor bala ka mire vajud men hai
ye kis ne meri nazar ko banaya aina
ye nuur kis ne ujala mire vajud men hai
is ek fikr ne ghole miri hayat men gham
tu duur kyuun nahin jaata mire vajud men hai
koi charagh miri samt bhi ravana karo
bahut dinon se andhera mire vajud men hai
jo buund buund jalati hai tan badan mera
vo agahi ki tamanna mire vajud men hai
main ek mauj men huun jab se raushni mili hai
ye lag raha hai ki duniya mire vajud men hai
main band aankh se duniya ko dekh sakta huun
ik aisi chashm-e-tamasha mire vajud men hai
Leave a Reply