Jameel Mazhari
ba-qadr-e-paimana-e-taḳhayyul surur har dil men hai ḳhudi ka
agar na ho ye fareb-e-paiham to dam nikal jaa.e aadmi ka
bas ek ehsas-e-na-rasa.i na josh is men na hosh us ko
junun pe halat rubudgi ki ḳhirad pe aalam ghunudgi ka
hai ruuh tarikiyon men hairan bujha hua hai charagh-e-manzil
kahin sar-e-rah ye musafir paTak na de bojh zindagi ka
ḳhuda ki rahmat pe bhuul baiThun yahi na ma.ani hai is ke vaa.iz
vo abr ka muntazir khaḌa ho makan jalta ho jab kisi ka
vo laakh jhukva le sar ko mere magar ye dil ab nahin jhukega
ki kibriya.i se bhi ziyada mizaj nazuk hai bandagi ka
‘jamil’ hairat men hai zamana mire taghazzul ki muflisi par
na jazba-e-ijtiba-e-rizvi na kaif ‘parvez-shahidi’ ka
Leave a Reply