Faza Ibn E Faizi
main hi ik shaḳhs tha yaran-e-kuhan men aisa
kaun avara phira kucha-e-fan men aisa
ham bhi jab tak jiye sarsabz hi sarsabz rahe
vaqt ne zahr utara tha badan men aisa
zindagi ḳhud ko na is ruup men pahchan saki
aadmi lipTa hai ḳhvabon ke kafan men aisa
har ḳhizan men jo baharon ki gavahi dega
ham bhi chhoḌ aa.e hain ik shola chaman men aisa
log mujh ko mire ahang se pahchan ga.e
kaun badnam raha shahr-e-suḳhan men aisa
apne mansuron ko is daur ne puchha bhi nahin
paḌ gaya raḳhna saf-e-dar-o-rasan men aisa
hai tazadon bhari duniya bhi ham-ahang bahut
fasla to nahin kuchh sang o saman men aisa
vaqt ki dhuup ko mathe ka pasina samjha
main sharabor raha dil ki jalan men aisa
tum bhi dekho mujhe shayad to na pahchan sako
ai miri raato men Duuba huun gahan men aisa
Leave a Reply