asir-e-bahr-o-bar koi nahin hai
jahan men muḳhtasar koi nahin hai
hai dhaḌka sa mire siine men lekin
dar-e-ummid par koi nahin hai
mira saaya simaT aaya hai mujh men
mira ab ham-safar koi nahin hai
havadis bhi vahin ham bhi vahin hain
magar ab chashm-e-tar koi nahin hai
nazar hi baam par meri nahin ya
nazar ke baam par koi nahin hai
ba-juz mere yahan meri vafa ka
havala mo’atabar koi nahin hai
samajh kar soch kar dil men utarna
yahan bahar ko dar koi nahin hai
ḳhirad ke laakh qasid hain to honge
junun ka nama-bar koi nahin hai
mujhe apnane vaale log ‘tahir’
bahut se hain magar koi nahin hai
Leave a Reply