Juz Rishta-E-KHulus Ye Rishta Kuchh Aur Tha

Mohammad Ahmad

juz rishta-e-ḳhulus ye rishta kuchh aur tha

tum mere aur kuchh main tumhara kuchh aur tha

jo ḳhvab tum ne mujh ko sunaya tha aur kuchh

ta.abir kah rahi hai ki sapna kuchh aur tha

ham-rahiyon ko jashn manane se thi gharaz

manzil hanuz duur thi rasta kuchh aur tha

ummid-o-bim, ishrat-o-usrat ke darmiyan

ik kashmakash kuchh aur thii, kuchh tha kuchh aur tha

ham bhi the yuun to mahv-e-tamasha-e-dahr par

dil men khaTak si thi ki tamasha kuchh aur tha

jo baat tum ne jaisi suni Thiik hai vahi

main kya kahun ki yaar ye qissa kuchh aur tha

‘ahmad’ ghazal ki apni ravish apne taur hain

main ne kaha kuchh aur hai socha kuchh aur tha