KHirad Ki Rah Mein Har moD Par Dhoke Nikal Aae

Sanjay Mishra Shauq

ḳhirad ki raah men har moḌ par dhoke nikal aa.e

bisat-e-amn par bhi jang ke naqshe nikal aa.e

zaruri hai ham apni zindagi ko aa.ina rakkhen

ye chadar kaun oḌhega agar dhabbe nikal aa.e

mohabbat ka use iqrar karna hi paḌa lekin

ye sukhe peḌ se kaise hare patte nikal aa.e

bahut din ba.ad jab main ne ḳhudi ka aa.ina dekha

to ḳhud mere hi chehre se ka.i chehre nikal aa.e

kabhi haare sipahi ki tarah vapas nahin palTe

ham aansu ki tarah ik baar jo ghar se nikal aa.e

hatheli par ugana chahte hain khet sarson ke

mire bachche to apni umr se aage nikal aa.e

julus-e-amn jab nikla to ham ne ‘shauq’ ye dekha

kahin ḳhanjar nikal aa.e kahin neze nikal aa.e