Tamanna Hai Sanwar Jaane Se Pahle

tamannā hai sañvar jaane se pahle

tujhe dekhūñ nikhar jaane se pahle

kabhī mujh par bhī ho nazar-e-ināyat

merī hastī bikhar jaane se pahle

tere pahlū meñ hī nikle mirā dam

yahī ḳhvāhish hai mar jaane se pahle

chalo ek pyaar kā paudhā lagā.eñ

bahāroñ ke guzar jaane se pahle

guzarnā hai mujhe un kī galī se

vuzū kar luuñ udhar jaane se pahle

chalo ik dūsre meñ Duub jaa.eñ

ujāloñ ke ubhar jaane se pahle

Leave a Comment