Kabhi Taqsir Jis Ne Ki Hi Nahin

Ismail Merathi

kabhi taqsir jis ne ki hi nahin

ham se puchho to aadmi hi nahin

mar chuke jite-ji khusha qismat

is se achchhi to zindagi hi nahin

dosti aur kisi gharaz ke liye

vo tijarat hai dosti hi nahin

ya vafa hi na thi zamane men

ya magar doston ne ki hi nahin

kuchh miri baat kimiya to na thi

aisi bigdi ki phir bani hi nahin

jis khushi ko na ho qayam-o-davam

gham se bad-tar hai vo khushi hi nahin

bandagi ka shuur hai jab tak

banda-parvar vo bandagi hi nahin

ek do ghunt jam-e-vahdat ke

jo na pi le vo muttaqi hi nahin

ki hai zahid ne aap duniya tark

ya muqaddar men us ke thi hi nahin