firaq-gorakhpuri

Parchhaiyan

1

ye shaam ik aina-e-nil-gun ye nam ye mahak

ye manzaron ki jhalak khet baagh dariya gaanv

vo kuchh sulagte hue kuchh sulagne vaale alaav

siyahiyon ka dabe-panv asman se nuzul

laton ko khol de jis tarah shaam ki devi

purane vaqt ke bargad ki ye udaas jataen

qarib o duur ye go dhuul ki ubharti ghataen

ye kaenat ka thahrao ye athah sukut

ye nim-tirah faza roz-e-garm ka tabut

dhuan dhuan si zamin hai ghula ghula sa falak

2

ye chandni ye havaen ye shakh-e-gul ki lachak

ye daur-e-bada ye saz-e-khamosh fitrat ke

sunai dene lagi jagmagate sinon men

dilon ke nazuk o shaffaf abginon men

tire khayal ki padti hui kiran ki khanak

3

ye raat chhanti havaon ki sondhi sondhi mahak

ye khet karti hui chandni ki narm damak

sugandh raat ki raani ki jab machalti hai

faza men ruh-e-tarab karvaten badalti hai

ye ruup sar se qadam tak hasin jaise gunah

ye arizon ki damak ye fusun-e-chashm-e-siyah

ye dhaj na de jo ajanta ki sanaton ko panah

ye siina pad hi gai dev lok ki bhi nigah

ye sar-zamin se akash ki parastish-gah

utarte hain tiri aarti sitara o maah

sajal badan ki bayan kis tarah ho kaifiyyat

sarasvati ke bajate hue sitar ki gat

jamal-e-yar tire gulsitan ki rah rah ke

jabin-e-naz tiri kahkashan ki rah rah ke

dilon men aina-dar-aina suhani jhalak

4

ye chhab ye ruup ye joban ye saj ye dhaj ye lahak

chamakte taron ki kirnon ki narm narm phuvar

ye rasmasate badan ka uthan aur ye ubhar

faza ke aina men jaise lahlahae bahar

ye be-qarar ye be-ikhtiyar josh-e-numud

ki jaise nuur ka favvara ho shafaq-alud

ye jalve paikar-e-shab-tab ke ye bazm-e-shohud

ye mastiyan ki mai-e-saf-o-durd sab be-bud

khajil ho lal-e-yaman uzv uzv ki vo Dalak

5

bas ik sitara-e-shingaraf ki jabin pe jhamak

vo chaal jis se labalab gulabiyan chhalken

sakun-numa kham-e-abru ye adh-khulin palken

har ik nigah se aiman ki bijliyan lapken

ye aankh jis men kai asman dikhai paden

uda den hosh vo kanon ki saada saada laven

ghataen vajd men aaen ye gesuon ki latak

6

ye kaif-o-rang-e-nazara ye bijliyon ki lapak

ki jaise krishn se radha ki aankh ishare kare

vo shokh ishare ki rabbaniyat bhi jaae jhapak

jamal sar se qadam tak tamam shoala hai

sukun jumbish o ram tak tamam shoala hai

magar vo shoala ki ankhon men Daal de thanDak

7

ye raat niind men Duube hue se hain dipak

faza men bujh gae ud ud ke jugnuon ke sharar

kuchh aur taron ki ankhon ka badh chala hai khumar

fasurda chhitki hui chandni ka dhundla ghubar

ye bhigi bhigi udahat ye bhiga bhiga nuur

ki jaise chashma-e-zulmat men jale kafur

ye Dhalti raat sitaron ke qalb ka ye gudaz

khunuk faza men tira shabnami tabassum-e-naz

jhalak jamal ki taabir khvab aina-saz

jahan se jism ko dekhen tamam naz-o-niyaz

jahan nigah thahar jaae raz-andar-raz

sukut-e-nim-shabi lahlahe badan ka nikhar

ki jaise niind ki vaadi men jagta sansar

hai bazm-e-mah ki parchhaiyon ki basti hai

faza ki ot se vo khamushi barasti hai

ki buund buund se paida ho gosh o dil men khanak

8

kisi khayal men hai gharq chandni ki chamak

havaen niind ke kheton se jaise aati hon

hayat o maut men sargoshiyan si hoti hain

karodon saal ke jaage sitare nam-dida

siyah gesuon ke saanp nim-khvabida

ye pichhli raat ye rag rag men narm narm kasak

More Poems

Leave a Comment