Poet
rah rah kar jo thak kar baiThe us ko chalna kab aata hai
yaar musalsal chalte rahne se chalne ka Dhab aata hai
divanon ki duniya ke dastur bahut ulTe hote hain
manzil mil jaati hai pahle tab ja kar maktab aata hai
is duniya men muflis hona maut se kuchh aage ka dukh hai
us ke bhi bachche bhuke hain jis ko yahan kartab aata hai
isi liye to roka nahin hai main ne us ko chale jaane se
mujh ko ye bhi dekhna hai vo lauT ke aḳhir kab aata hai
jin logon men mehnat ke jazbe hain vo saare bebas hain
aur jo kuchh bhi kar nahin paate un logon ko sab aata hai
Leave a Reply