Poet
mustaqil diid ki ye shakl nazar aa.i hai
dil men ab aap ki tasvir utar aa.i hai
tu ne kis lutf se chheḌa hai unhen mauj-e-nasim
jhuum kar zulf-e-siyah ta-ba-kamar aa.i hai
kah rahe hain tiri ankhon ke badalte tevar
ye hansi aaj ba-andaz-e-digar aa.i hai
zindagi naach ki vo jan-e-chaman jan-e-bahar
dast-e-rangin men liye saghar-e-zar aa.i hai
dil ho masrur ki aghosh-e-ḳhizan-dida men phir
lahlahati hui shaḳh-e-gul-e-tar aa.i hai
vo za-sar-ta-ba-qadam husn ki ik aab liye
jagmagati hui manind-e-guhar aa.i hai
ho na hairan ki andhere hain ujalon ki dalil
shaam ke ba.ad hi ai dost sahar aa.i hai
ban ke gharqab safine ki machalti hui yaad
sina-e-bahar pe ik mauj ubhar aa.i hai
karam-e-rahbar-e-sadiq ke nisar ai ‘muztar’
zindagi saḳht marahil se guzar aa.i hai
Leave a Reply