Lakh Pardon Mein Go Nihan Hum The

Sufi

laakh pardon men go nihan ham the

phir bhi har chiiz se ayaan ham the

ek aalam ke tarjuman ham the

un ke aage hi be-zaban ham the

ham hi ham the vahan jahan ham the

aap aae to phir kahan ham the

har rag-o-pai men barq raqsan thi

haae vo vaqt jab javan ham the

aaj to khair se hain arsh-maqam

kal zamin par bhi asman ham the

gham ke maron ko naaz tha ham par

jazba-e-gham ke tarjuman ham the

har qadam pe thi samne manzil

su-e-manzil ravan-davan ham the

zindagi bhar jo lab pe aa na saki

dard-o-gham ki vo dastan ham the

doston ka to zikr kya ‘atish’

dushmanon par bhi mehrban ham the