sair-e-chaman hai aur vo gul-ru kanar men
main be-piye bhi mast huun ab ki bahar men
kab se huun kya bata.un talash-e-bahar men
ik phuul bhi na tha chaman-e-rozgar men
chalen na.i na.i si hain raftar-e-yar men
paḌ ja.ega ḳhalal ravish-e-rozgar men
dil aur jaan donon bhi hain kis shumar men
aap iḳhtiyar men hain to sab iḳhtiyar men
kyuun na-umid aap ka ummid-var ho
sab kuchh hai kya nahin nigah-e-sharmsar men
mujh ko jab apni baat ka rahta nahin ḳhayal
kyuun bad-zani na aa.e dil-e-razdar men
is se ziyada lutf ka talib nahin huun main
ummid ban ke rah dil-e-ummid-var men
ya maut aa.egi mujhe ya niind aa.egi
aur ek shab guzar to duun intizar men
ai dard-e-ishq baat to jab hai ki mere dost
marne ke ba.ad chain na pa.un mazar men
naala ḳhilaf-e-va.ada kiya haa.e kya kiya
sun le jo vo to farq paḌa e’tibar men
vo kyuun bula.en bazm men mujh bad-nasib ko
ghul-mil ke baiThna nahin aata hai chaar men
main ne bhi tauba toḌ di apni to kya hua
duniya ke log kya nahin karte bahar men
mera vaqar aap ka aram bhi gaya
aḳhir ye kya bala hai dil-e-be-qarar men
ik taaza vardat hai har ek dam ke saath
mere irade aa nahin sakte shumar men
sau mehrbaniyon ke evaz muskura diya
sarkar ne kamal kiya iḳhtisar men
hoga jab un ka qahr qayamat hi aa.egi
zinde rahenge ghar men na murde mazar men
kahte hain log maut se bad-tar hai intizar
meri tamam-umr kaTi intizar men
niklega ab ke jo bhi tira ai mughan-navaz
phulon men rakh ke denge tujhe ham bahar men
naseh bhi charagar bhi ye do do azaab kyuun
munkir-nakir aate hain vo bhi mazar men
khaa.i hui qasam to ḳhuda ke liye na kha
apni taraf se farq na Daal e’tibar men
zahid ki tarah aur hain masjid men saikḌon
ye kis shumar men hai vahan kis qatar men
ishq aur aap vaah safi’ vah-vah-va
gham aur haa.e zindagi-e-musta.ar men
Leave a Reply