Poet
ajab bigḌe muqaddar ban ga.e hain
jo dariya the samundar ban ga.e hain
zamin se uḌ ke zarre asman par
mah-o-parvin-o-aḳhtar ban ga.e hain
sar-e-lauh-e-tasavvur kaise kaise
adhure naqsh paikar ban ga.e hain
hamen baḳhshi hai narmi mausamon ne
magar kuchh log patthar ban ga.e hain
mila hai yuun hamen gham ka ḳhazana
hamare ashk gauhar ban ga.e hain
shab-e-gham bhule-bisre chand chehre
charagh-e-qalb-e-muztar ban ga.e hain
unhen kya ḳhauf ho ‘shahid’ ḳhuda ka
ḳhuda jo is zamin par ban ga.e hain
Leave a Reply