Bilqis Zafirul Hasan
apni to koi baat banae nahin bani
kuchh ham na kah sake to kuchh us ne nahin suni
yuun to chahar samt hai apne hisar-e-shab
ham tirgi ko chhed ke laate hain raushni
nadida manzaron se tarashe hain khvab zaar
kab dar-khur-e-nigah koi manzar hai didani
ochha tha vaar us ka magar ham na bach sake
kisi zahr men bujhai thi us shakhs ne ani
har-dil-aziz vo bhi hai ham bhi hain khush-mizaj
ab kya bataen kaise hamari nahin bani
auron ki tarah ham bhi magar jhel jaenge
sab zindagi samajhte hain jis ko vo jan-kani
‘bilqis’ apni baat to sab se alag rahi
na-guftani suni hai kahi na-shunidani
Leave a Reply