mire danton ki umr ai aarzu mujh se bhi chhoti thi
usi ne saath chhoda dant-kati jin se roti thi
shikayat aarzu ki be kiye naseh nahin banti
ye sab dil-juiyan zahir ki thi batin ki khoti thi
hava dar dar liye phirti hai ab to meri mitti ko
ye hai vo khaak jo ik din tire qadmon pe loti thi
bahut gahre na hon ochhe sahi charke to puure hain
khata qatil ki kya hai ik dara talvar chhoti thi
pahad us par gira ai asman kya bas chale varna
hamare ashiyan ki shakh sab shakhon se moti thi
bala kar tu ne ai hasti yahan ki khuub mehmani
vahi karte hain faaqe jin ke dam se das ki roti thi
pahunch jaati thi us us ghar men jis jis ghar ka paasa tha
jo sach puchho to meri aarzu chausar ki goti thi
na kyuun kar teri yaktai ka kalima naqsh ho dil par
sabaq ki tarah barson ye ibarat ham ne ghoti thi
mujhe khush khush jo paaya jal ke kya jaldi hui rukhsat
shab-e-vasl ai falak sab kuchh sahi niyyat ki chhoti thi
ye sach hai ‘shad’ kya tha kuchh na tha lekin tumhara tha
na samjha tum ne ai barik-bino baat moti thi
Leave a Reply