pas-e-taqrib-e-mulaqat yahan shaam dhale
der tak phaili rahegi tiri shirkat ki mahak
mutarannim se rahenge ye hava ke goshe
jin men ghaltida hai ab lahn-e-takallum tera
raat bhar phaili rahegi ye taassur ki shafaq
jazb hai jis men dil-avez tabassum tera
yaad rah jaegi is sehn ko ye sham-e-fusun
jal gai thiin kai an-dekhi suhani shamen
lau sa de uttha tha mahaul tire aane ka
chha gaya tha dar-o-divar pe vo partav-e-rang
jaise makhuz hon lamhe kisi afsane se
chhod jaega vahi narm kasak phir dil men
jis se shadab hai muddat se mira zauq-e-talab
aaj taqrib men ye tarz-e-mulaqat tira
be-niyazana takhatub men pareshan sa tire
gosha-e-lab pe koi harf shanasai ka
tamkanat vaali adaon men anokha sa niyaz
mujtanib ankhon men ik aks pazirai ka
aam mauzu-e-sukhan men bhi ayaan lahja-e-khas
zehn ki baat men bhi dil ki dhamak ka ehsas
ik tahum sa kisi ghamza-e-ghaltida men
ek manus sa kham kakul-e-paichida men
tujh se ye rabt ki mauhum bhi mafhum bhi hai
tu ki hai mujh se tiri ziist ka har rang juda
sharh-e-halat alag umr ka ahang siva
pahle hi raah men haael hai khalij-e-aqdar
tu ne tabinda bhi rakkha hai tira khatt-e-hisar
phir bhi ik qurb ki khushbu hai faza men bedar
ye rah-o-rasm jo iz.har-e-mohabbat bhi nahin
hai tire dam se ye rahat ki jo rahat bhi nahin
gham-e-be-nam tire naam se mausum bhi hai
husn se rabta-e-ishq ke mazmun hain bahut
is latafat-kada-e-kaif men afsun hain bahut
na tire jism ka sandal na tire lab ke gulab
na tiri zulf ki shabnam hai is ehsas ka naam
yuun to is shaam ka paikar bhi hai tera ye jamal
is shanasai ka unvan hai faqat nik.hat-e-sham
chashm-e-hamdam ki ata-karda ye asaish-e-did
mehrban husn ka bakhsha hua ye izn-e-kalam
aaj phir jagti rah jaegi har baam tale
vahi shadab si hasrat vahi asuda kasak
der tak phaili rahegi tiri shirkat ki mahak
pas-e-taqrib-e-mulaqat yahan shaam dhale
Leave a Reply