Arzoo Lakhnavi
bhole ban kar haal na puchho bahte hain ashk to bahne do
jis se baḌhe bechaini dil ki aisi tasalli rahne do
rasmen is andher-nagri ki na.i nahin ye purani hain
mehr pe Daalo raat ka parda maah ko raushan rahne do
ruuh nikal kar bagh-e-jahan se bagh-e-jinan men ja pahunche
chehre pe apne meri nigahen itni der to rahne do
ḳhanda-e-gul bulbul men hoga gul men naghma bulbul ka
qissa ek zabanen do hain aap kaho ya kahne do
itna junun-e-shauq diya kyuun ḳhauf jo tha rusva.i ka
baat karo ḳhud qabil-e-shikva ulTe mujh ko rahne do
Leave a Reply