Poet
izzat unhen mili vahi aḳhir baḌe rahe
jo ḳhaak ho ke aap ke dar par paḌe rahe
ai dost mughtanim hain vo muradan-e-ba-vaqar
usrat men bhi jo aan pe apni aḌe rahe
payab ho ke sail ne un ke qadam liye
manjdhar men jo paanv jama.e khaḌe rahe
paḌti nahin har ek pe us ki nigah-e-naz
saaqi ke astan pe hazaron paḌe rahe
apnon ki talḳh-goi ki lazzat na puchhiye
bhale se umr bhar rag-e-jan men gaḌe rahe
manind-e-sang-e-mil dikha.i har ik ko raah
lekin ḳhud apne paanv zamin men gaḌe rahe
zalim se ek bose pe barson rahi hai zid
aḳhir tak apni baat pe ham bhi aḌe rahe
shayad ki multafit ho koi shahsavar-e-naz
kis aarzu se ham sar-e-manzil khaḌe rahe
fitne bahut hain but-kada o ḳhanqah men
achchhe rahe jo dasht-e-junun men paḌe rahe
‘vasif’ ka intizar tha sahra men bad-e-qais
kanTe bhi muddaton yunhi pyase paḌe rahe
Leave a Reply