Hazaron Siten Aisi Ki Har Site Pe Dam Nikle

Shahid Jameel

hazaron siten aisi ki har site pe dam nikle

na puchho kis tarah phir cyber cafe se ham nikle

sab ashiq thak ga.e upload kar ke apni site par

visal-e-yar ki cd men sau sau pech-o-ḳham nikle

vahan ab har taraf computeron ke chuhe phirte hain

mire likhne ke kamre se sabhi kaghaz qalam nikle

adu ka password uf kis bala ka pairahan nikla

ghazab ki jalva-ara.i men shishe ke sanam nikle

hamen site-navardi ko to gōgle jam-e-jam Thahra

jahan-bini ko ab kyunkar ye kamre se qadam nikle

qayamat-ḳhez chatting men halakat-ḳhez hacking thi

so apni pass-bōk men Dher se a.adad kam nikle

blogging ki qasam bad-qismati kya virus nikli

ḳhushi ki downloading ki alam ke zer-o-bam nikle

raqib-o-yar ki tuning kahan chal kar kahan pahunchi

baramad junk mailon men murakkab pech-o-ḳham nikle

ḳhusha ai vadi-e-surfing ba-chashm-e-‘shahid’-e-hairan

hamare bi-focal men ghazab ke zer-o-bam nikle