Marghoob Asar Fatmi
ham to mas.hur the shiddat ke sabab bol uThe
vo but-e-sang bhi mumkin hai ki ab bol uThe
phuul alfaz ke phenke hain usi ki janib
jaane vo jan-e-ada naaz se kab bol uThe
samna un ka hua jab to thi nazren nichi
be-qarari men mire dast-e-talab bol uThe
qatl mera bhi hua aur shah-e-vaqt ka bhi
ik pe ḳhamosh rahe ek pe sab bol uThe
uTh ke sahraon se maghrib ko hila de andhi
yak-zaban ho ke agar arz-e-arab bol uThe
mutma.in kyuun hain javan chhati pe patthar rakh kar
vaqt paḌne pe ‘asar’ koh ke lab bol uThe
Leave a Reply