Poet
husn-e-tadbir ka mo.ajiza dekhiye
kaam himmat se le kar zara dekhiye
aap aur ham se iz.har-e-lutf-o-karam
aa.ina dekhiye aa.ina dekhiye
ashiyane ki buniyad rakkhega phir
pahle bagh-e-jahan ki hava dekhiye
aag se khelne ko patanga baḌha
haisiyat dekhiye hausla dekhiye
jab kaha hai to jalva dikha.enge vo
saans jab tak chale rasta dekhiye
kuchh idhar bhi hain ummid-var-e-karam
mehrban is taraf bhi zara dekhiye
jurm-e-zikr-e-vafa par vo kahne laga
ja ke anjam-e-ahl-e-vafa dekhiye
Leave a Reply