Nazm Tabatabai
bid.at masnun ho ga.i hai
ummat mat.un ho ga.i hai
kya kahna tiri dua ka zahid
gardun ka sutun ho ga.i hai
rahne do ajal jo ghaat men hai
mujh par maftun ho ga.i hai
hasrat ko ghubar-e-dil men DhunDo
zinda madfun ho ga.i hai
vahshat ka tha naam avval avval
ab to vo junun ho ga.i hai
vaa.iz ne buri nazar se dekha
mai shishe men ḳhuun ho ga.i hai
aariz ke qarin gulab ka phuul
ham-rang ki duun ho ga.i hai
banda huun tira zaban-e-shirin
duniya mamnun ho ga.i hai
‘haidar’ shab-e-gham men marg-e-nagah
shadi ka shugun ho ga.i hai
Leave a Reply