Rafat Shameem
ab jo uTThenge to kandhon pe uThana hoga
bistar-e-ḳhak pe phir ham ko sulana hoga
ham se ujḌe hue logon se bhi mil kar dekho
darmiyan koi to ik rabt purana hoga
aḳhiri dhuup hain ankhon men basa lo varna
phir kahan ḳhvab kisi shab ka suhana hoga
jab ho isbat hi ḳhud apni nafi ka baa.is
dil ko har qaid-e-tamanna se chhuḌana hoga
teri duniya ki aziyyat to uTha li yarab
bojh uqba ka bhi kya yuun hi uThana hoga
Leave a Reply