Qamar Aasi
main ne kuchh ash.ar junhi aa.ine par dam kiye
aks tera la dikhaya us ne sar ko ḳham kiye
ki sama.at ki tavazo.a is madhur avaz se
rizq-e-bina.i usi paikar ke zer-o-bam kiye
muhr honTon se laga.i is zamin-e-husn par
apne qabze is zamin par aur mustahkam kiye
jaan Daali tazkira-e-yar se alfaz men
sidhe-sade sher us ke zikr se mub.ham kiye
raat guzri maḳhmali hathon ke takiye par miri
shukr hai maula mayassar tu ne ye resham kiye
sub.h-e-vasl us ki chahak se guunj uTThe bam-o-dar
bolti thi pahle jo avaz ko maddham kiye
bah raha tha lams ka dariya guzashta shab ‘qamar’
ḳhuub ham ne bhi masam-e-jism us se nam kiye
Leave a Reply