Hasnain Aqib
tumhare chehre ki jo chamak hai
ye saat rangon ki ik dhanak hai
tumhari chuḌi ki jaise chhan-chhan
tumhare lahje men vo khanak hai
subuk-ravi jaise bahta paani
tumhare chalne men vo lachak hai
ghazal si hain ye tumhari ankhen
haya bhi jin men palak palak hai
jahan rakho tum qadam zamin vo
mire liye to hasin falak hai
agarche baten tumhari shirin
zara sa lafzon men bas namak hai
tumhen mohabbat agar hai mujh se
qubul karne men kyon jhijak hai
ravan-davan hai tumhari janib
mire iradon ki jo saḌak hai
ye kaifiyat hai jo donon janib
ye sho.ala-e-ishq ki lapak hai
hai ishq ke naam se jo maruf
ye tajraba apna mushtarak hai
hai biich apne agarche duuri
magar ye duuri visal tak hai
ghazal miri tum jo paḌh rahi ho
vo shiddat-e-hijr ki kasak hai
Leave a Reply