Pawan Kumar
kisi ne rakkha hai bazar men saja ke mujhe
koi ḳharid le qimat miri chuka ke mujhe
usi ki yaad ke bartan bana.e jaata huun
vahi jo chhoḌ gaya chaak par ghuma ke mujhe
hai mere lafzon ko mujh se munasibat kitni
main kaisa naghma huun pahchan gunguna ke mujhe
main aisi shaḳh huun jis par na phul-patte hain
tu dekh leta kabhi kaash muskura ke mujhe
kaḌi hai dhuup to suraj se kya gila kiije
yahan to chand bhi pesh aaya tamtama ke mujhe
use bhi vaqt kabhi aa.ina dikha.ega
vo aaj ḳhush hai bahut aa.ina dikha ke mujhe
qaside paḌhta huun main us ki dil-navazi ke
jalil karta hai aksar jo ghar bula ke mujhe
Leave a Reply