sar-e-taslim ḳham karna paḌa taqsir se pahle
mohabbat ki saza mujh ko mili ta.azir se pahle
bura hoga hamari raah men aaya agar koi
ki ham shamshir ban ja.enge ḳhud shamshir se pahle
mohabbat ki nazar ik ik nafas par kaam karti hai
tujhe ham dekh lete hain tiri tasvir se pahle
mohabbat ka zamana bhi ajab dilkash zamana tha
asiri meri sabit ho ga.i zanjir se pahle
hamare nama-e-pur-shauq likhne par ye pabandi
qalam ki ja.engi kya ungliyan tahrir se pahle
mohabbat ki amanat yunhi insan ne nahin paa.i
kiya hai ghaur ḳhud qudrat ne bhi taqdir se pahle
koi aise men bedari ka de paigham ai ‘sha.ir’
zamana hosh men aata nahin taqrir se pahle
Leave a Reply