Hum Jaan Ke Unki Mahfil Mein Aghyar Ki Baaten Karte Hain

Poet

ham jaan ke un ki mahfil men aghyar ki baten karte hain

phulon ko satane ki ḳhatir ham ḳhaar ki baten karte hain

kuchh log gulabon ki surat kanTon se guzara karte hain

mahrum-e-mohabbat ho kar bhi vo pyaar ki baten karte hain

kaliyon ko chaTakta dekh ke jo bijli ko pukara karte the

ab raakh uḌa kar log vahi gulzar ki baten karte hain

afsos hai un insanon par jo chand nivalon ki ḳhatir

shahon ke qaside likhte hain sarkar ki baten karte hain

dekha hai jab se phulon ne ai jaan tumhare chehre ko

aapas men tumhare honTon ki ruḳhsar ki baten karte hain

jo saari umr fasilon men suraj ki shuaon ko tarse

vo log hamin se kuche ki bazar ki baten karte hain

jo raat ko apne saath liye aa.e the shahr ki galiyon men

ab nuur ke taḌke sub.hon ke asar ki baten karte hain

vo zinda tha to koi bhi pursan-e-hal na tha us ka

ab kitne shauq se log usi bimar ki baten karte hain