Chander Wahid
ehsas pe bojhal kuchh sadmat ka qissa hai
gham sirf taḳhayyul ke lamhat ka qissa hai
shayad main nahin kuchh bhi shayad main bahut kuchh huun
kya jaane mira jivan kis baat ka qissa hai
aaya huun kahan se main jaana hai kahan aḳhir
har sher mira in hi fikrat ka qissa hai
khoi hui manzil ke ham bhaTke musafir hain
kuchh aur nahin duniya be-bat ka qissa hai
chal dena sahar hote so jaana kahin thak kar
ham jaise faqiron ke din-rat ka qissa hai
Leave a Reply