Poet
kabhi ḳhirad ka kabhi ishq ka bahana tha
miri hayat ka maqsad fareb khana tha
tiri nigah ko gahra.iyon men jaana tha
mire sukut ki har tah men ik fasana tha
chaman ke ek hi goshe men hai hujum-e-bahar
ye vo jagah hai jahan mera ashiyana tha
ḳhizan ka ḳhauf tha ghunchon ko fasl-e-gul men magar
vo muskura ke rahe jin ko muskurana tha
jahan hua tha unhen pa-shikastagi ka guman
musafiron ko vahin se qadam baḌhana tha
shab-e-firaq ke maare hue na dekh sake
tulu-e-sub.h ka manzar bahut suhana tha
vo be-ḳhabar hain mohabbat se jo ye kahte hain
kisi ki yaad men duniya ko bhuul jaana tha
jahan-jahan main ruka vaqt ke qadam bhi ruke
mira vajud ḳhud apni jagah zamana tha
huzur-e-husn majal-e-nazar na thi ‘shahid’
hamen ḳhud apne muqaddar ko azmana tha
Leave a Reply