zindagi vaj.h-e-munajat nazar aati hai
maut mayus-e-kamalat nazar aati hai
muḳhtasar tu ne jo di hai mujhe do din ki hayat
mere kaase men ye ḳhairat nazar aati hai
kya kisi shimr ne phir ḳheme jala Daale hain
sar ko khole hue sadat nazar aati hai
kuchh miri baat ki ta.id kiya karte hain
kuchh ko to sirf ḳhurafat nazar aati hai
us ki har baat mujhe lagti hai achchhi lekin
main jo bolun to ghalat baat nazar aati hai
ab kisi aur ko bhi sochte dil Darta hai
hijr ki guzri hui raat nazar aati hai
Leave a Reply