Amir Hamza Saqib
teri inayaton ka ajab rang Dhang tha
tere huzur pa-e-qana.at men lang tha
sahra ko raundne ki havas pa-ba-gil hai ab
yuun tha kabhi ki daman-e-afaq tang tha
daman ko tere thaam ke rahat baḌi mili
ab tak main apne aap se masruf-e-jang tha
hangam-e-yad dil men na aahaT na dastaken
shorish-kade men raat ḳhamoshi ka rang tha
tu aaya lauT aaya hai guzre dinon ka nuur
chehron pe apne varna to barson ka zang tha
raqs-e-junun men bhi tha tariq-e-hunar ka Dhab
sufi-e-ba-safa tha koi ya malang tha
kya asman uThate mohabbat men jab ki dil
tar-e-nigah men uljhi hui ik patang tha
Leave a Reply