Aziz Hamid Madni
ek-adh harif-e-gham-e-duniya bhi nahin tha
arbab-e-vafa men koi itna bhi nahin tha
lab jalte hain mai-ḳhvaron ke siine nahin jalte
is darja ḳhunuk sho.ala-e-mina bhi nahin tha
ik us ka taghaful hai vo yaad aa hi gaya hai
ik vada-e-farda hai vo bhula bhi nahin tha
kah sakte to ahval-e-jahan tum se hi kahte
tum se to kisi baat ka parda bhi nahin tha
ab husn pe ḳhud us ka tasavvur bhi giran hai
pahle to giran ḳhvab-e-zuleḳha bhi nahin tha
pahle miri vahshat ke ye andaz bhi kam the
pahle mujhe andaza-e-sahra bhi nahin tha
ab ye hai ki thamta hua dariya hai tiri yaad
be-faiz ye dariya kabhi aisa bhi nahin tha
achchha to muravvat hi tira bosa-e-lab hai
achchha ye koi dil ka taqaza bhi nahin tha
majnun ke siva kis se uThi minnat-e-didar
aḳhir ruḳh-e-laila tha tamasha bhi nahin tha
Leave a Reply