faiz-ahmad-faiz

Husn Marhun-E-Josh-E-Baada-E-Naz

husn marhun-e-josh-e-bada-e-naz

ishq minnat-kash-e-fusun-e-niyaz

dil ka har taar larzish-e-paiham

jaan ka har rishta vaqf-e-soz-o-gudaz

sozish-e-dard-e-dil kise maalum

kaun jaane kisi ke ishq ka raaz

meri khamoshiyon men larzan hai

mere nalon ki gum-shuda avaz

ho chuka ishq ab havas hi sahi

kya karen farz hai ada-e-namaz

tu hai aur ik taghaful-e-paiham

main huun aur intizar-e-be-andaz

khauf-e-nakami-e-umid hai ‘faiz’

varna dil tod de tilism-e-majaz

More Poems

Leave a Comment