khaar matlub jo hove to gulistan mangun
bijli girne ko jo ji chahe to baran mangun
shama gul hove jo subh-e-shab-e-hijran mangun
os padni bhi ho mauquf jo yaran mangun
khaak men bhi jo milun main to kisi sahra men
tum se mitti bhi na ai gabr o musalman mangun
bakht-e-vazhun ne zaban ko ye asar bakhsha hai
talkhi-e-marg maza de jo namakdan mangun
khana-e-dil men karun dagh-e-mohabbat ko talab
raushni ke liye is ghar ke jo mehman mangun
padshahi se faqiri ka hai paaya baala
boriya chhod ke kya takht-e-sulaiman mangun
ranj se ishq ke hai raht-e-duniya bad-tar
zakhm-e-khandan huun agar main gul-e-khandan mangun
de diya kijiye saudai tumhara huun miyan
sunghne ko jo kabhi zulf-e-pareshan mangun
ashiqe-e-dast-e-nigarin huun ajab kya is ka
bhiik dariya se agar panja-e-marjan mangun
meve par bagh-e-jahan men ho jo dil ko raghbat
shajar-e-husn se main seb-e-zanakhdan mangun
jama-e-jism bhi rakhne ka nahin dast-e-junun
pairahan-e-khak men divana-e-uryan mangun
yas-o-hirman huun jo lohe ke chane bhi to chaba.un
neamat-e-ishq ke qabil lab-o-dandan mangun
milti ho mangne se bagh-e-jahan men jo murad
gul se bulbul ke kafan ke liye daman mangun
kab se dar par tire saail huun main ‘atish’ ki tarah
vo mile mujh ko jo kuchh ai shah-e-khuban mangun