Wo Nigah Mil Ke Nigah Se Ba-Ada-E-KHas Jhijhak Gai

Poet

vo nigah mil ke nigah se ba-ada-e-ḳhas jhijhak ga.i

to ba-rang-e-ḳhun miri aarzu miri chashm-e-tar se Tapak ga.i

kabhi ashk ban ke Dhalak ga.i kabhi rashk ban ke jhalak ga.i

vo sharab jam-e-hayat se jo shabab ban ke chhalak ga.i

miri ah-e-sa.iqa-bar jab mire tur-e-dil pe chamak ga.i

jo zamin se ta-ba-falak ga.i to falak se ta-ba-samak ga.i

main zahe-nasib ghira hua huun tajalliyon ke hujum men

ye shua kis ke jamal ki miri zulmaton men chamak ga.i

usi be-panah-e-nigah ka mujhe baar baar hadaf bana

ki dil aaj jhuum ke dil bana rag-e-jan bhi meri phaḌak ga.i

pas-e-dafn bhi na sukun mila tah-e-ḳhak hasrat-e-ishq ko

kabhi sabza ban ke lahak uThi kabhi phuul ban ke mahak ga.i

tiri chashm-e-mast ne saqiya bhare mai-kade ko bhula diya

kabhi yaad ban ke baras ga.i kabhi shisha ban ke khanak ga.i

koi kaash aa ke ‘vaqar’ ke bhi shikasta saaz ko chheḌ de

vo junun-navaz hava chali vo qaba-e-ghuncha masak ga.i